每年一度嘅科技界盛事CES消費電子展正式開幕，電競產品大廠Razer推出新版智能口罩Zephyr Pro，具備兩個風扇幫助抽風，以及支援聲音放大功能，確保戴住都可以順暢溝通。

今次呢個升級版本Zephyr Pro同Razer上年推出嘅Zephyr同樣採用N95等級濾材，左右兩則各有一個兩段速度（4200/6200RPM）雙進氣風扇保持空氣流通。但唔同嘅係，今次升級版口罩底部設有喇叭，可以將用家嘅聲音放大播出，最高可達60分貝音量輸出。喺風扇開啟嘅情況下，電池續航力大約5-6小時。

既然係電競大廠Razer出品，當然唔少得RGB啦，用家可以根據自己造型及喜好，透過專用APP自定燈光效果，多達1,680種顏色任你選擇。預計今年內會推出，售價為149.99美元（約HK$1,170）。