大家或者記得，上星期我哋報導過因為歐美國家對俄羅斯實施制裁，所以俄羅斯航太主席Dmitry Rogozin就喺Twitter發文威脅國際太空站會墜美、歐、中、印，結果Elon Musk用一張Space X標誌圖還擊嘅新聞。事隔一個星期，事情又有新發展，而呀Dmitry今次仲更加串咀添！

Dmitry Rogozin日前接受俄羅斯電視台「Russia 24」訪問時，就話會由當日起停運由俄羅斯企業「動力機械科研生產聯合體 (NPO Energomash)」生產嘅火箭引擎到美國，仲非常「好心」提醒大家呢啲引擎有幾咁重要，話由90年代中期就「已經幾常用」。最後佢仲加多兩句話「(冇咗我哋啲引擎) 叫佢哋搵其他嘢飛上天啦！用掃把又好乜鬼都好，唔知佢哋啦！」

圖片：TASS

平心而論，目前美國官方最常用嘅載貨火箭，包括ULA嘅擎天神 (Atlas) 火箭、以及軍工商Northrop Grumman使用嘅安塔瑞斯 (Antares) 載貨火箭，的確係用緊俄羅斯製嘅RD-180引擎。但ULA方面就指出，目前佢哋仲有廿幾個RD-180引擎放喺廠入面，足以應付到2025年前嘅所有飛行任務。同時自2014年俄羅斯入侵克里米亞地區、美國國會一度要求停用俄國引擎之後，ULA方面就同Jeff Bezos嘅Blue Origin合作研發新嘅BE-4引擎。而據ULA主席Tory Bruna就話「第一台BE-4已經喺工廠入面，進度良好」。簡單啲黎講，就即係短期內都唔使擔心ULA嘅太空任務。

Atlas V火箭

至於Northrop Grumman嘅「Antares」火箭，目前就冇官方回應俄羅斯禁運引擎會對佢哋嘅太空任務有咩影響。但佢哋原定於數年內嘅升空計劃都要用上俄製引擎，又冇聽講有預早開發替代品，睇黎就會成為俄羅斯禁運火箭引擎嘅最大受害者。

但又咁講，依家講起太空火箭，我阿媽都知有條友叫Elon Musk，就算唔計呀全球首富，又唔計「第二富」Jeff Bezos嘅Blue Origin，美國都仲有小型火箭生產商Rocket Lab、預期今年初會進行首次試射，主打3D打印火箭嘅Relativity等商業火箭製造商。加上近年美國政府及NASA越來越願意將重要任務交托於商業公司進行，要搵替代品其實就唔難嘅。

資料來源：TASS、The Verge、Techcrunch