所謂唔怕生壞命，至怕改壞名，呢個「定律」唔單止於人身上有效，就連喺產品名上都一樣有效。好似當年Samsung Note 7真係「碌實」，咁中國本田新推出嘅呢部「極湃1」……就應該好好「操」？操縱呀我指……

圖片：截圖自本田中國 on Weibo

卻說中國嘅廣汽本田，去年就宣佈成立電動車品牌e:N，本身都已經係個唔知點讀嘅「好名」黎，近日佢哋發佈品牌第一架車「e:NP1」嘅時候，就決定改返個正常些少嘅中文名，又認為呢部大約18-20萬人仔 (約HK$22-25萬) 嘅純電SUV係「極致」以及「澎湃」，於是就二合為一改名做「極湃」，架車好唔好渣目前未有人知，但至少呢個名就令到台灣網民 (相信福建嘅中國網民都係) 非常開心——因為「極湃」嘅國語讀音，與閩南話形容女性性器官嘅粗口基本一模一樣。

圖片：截圖自 Andy老爹 on Facecbook

如果你都係唔明，我就唯有再講白啲。正如廣東話鬧人會用個「閪」字，閩南話嘅同義詞就係「膣屄」，讀音大概係廣東話嘅「自by」，台灣方面亦通常會俗寫成「雞掰」。實際運用方面亦同「閪」差唔多，除咗可以直指身體器官，仲有「令人厭惡、厭煩」嘅意思，再衍生出「機歪」、「機車」等變化形。所以台灣人見到「極湃」呢個名就覺得好好笑啦。

資料來源：Andy老爹 on Facecbook