Will Smith於奧斯卡頒獎禮上掌摑Chris Rock一事，引起大眾連日關注，同時愈嚟愈多名人加入討論發表意見，日前NBA傳奇球星「天勾」Jabbar就寫咗篇千字文批評Will Smith，認為對方嘅行為鼓吹暴力、貶低女性、侮辱娛樂產業以及加深外界對黑人社群刻板印象...

日前Jabbar以「Will Smith Did a Bad, Bad Thing」為題於個人網誌發文，批評Will Smith除咗傷害Chris Rock，亦為男性、女性、娛樂產業以及黑人社群帶來打擊，表示：「有部份人會覺得Will Smith嘅舉動係浪漫護妻行為，但事實剛剛相反。如果Chris Rock係用拳腳攻擊Jada Pinkett Smith，Will Smith還手都好合理，之不過Chris Rock只係出口術，佢就打咗對方一巴，等於向大家宣布佢老婆受到言語攻擊時冇能力自護。」同時強調佢所認識嘅Jada Pinkett Smith係一位有能幹、堅強、聰明嘅女人，絕對有能力應付一個唔好笑嘅爛笑話，Will Smith呢種居高臨下、父權式嘅態度，將女性弱化成無助少女，需要一個強桿男人保護。

除此之外，Jabbar又批評Will Smith嘅舉動為黑人社群帶嚟影響，加深外界對黑人就係暴力、缺乏理性嘅刻板印象，奧斯卡所上演嘅行為正正就係種族主義者最想睇到嘅畫面，幫對家提供「彈藥」繼續邊緣化非裔美國人。另外，又令所有喜劇演員、諧星，唔敢再喺台上開一啲較為大膽或侮辱性嘅玩笑。