現時科學界普遍相信，恐龍滅絕於距今約6500萬年前嘅一次隕石撞擊。科學家估計當時有一粒寬5-15公里嘅隕石墜落於現今嘅墨西哥灣，造成寬170公里的希克蘇魯伯隕石坑，撞擊以及揚起嘅塵土造成嘅全球氣溫下降、生態系統崩塌，最後絕大部份植物及如恐龍等大形生物滅絕。而一群科學家早前就聲稱，於美國發現隕石撞擊當日死亡嘅恐龍化石，或有助了解當時嘅情況。

由Robert DePalma帶領嘅發掘團隊，於距離希克蘇魯伯隕石坑3,000公里嘅北達科他州Tanis化石場中，搵到一系列新化石。當中包括一隻「完美保存」嘅奇異龍後腿、一塊三角龍嘅皮膚、一隻可見翼龍BB在內嘅翼龍蛋，以及大量魚類、烏龜嘅化石，其中團隊於魚類化石嘅鰓部，發現一啲由岩石融化再冷卻而成、類似玻璃嘅藍莓石 (spherules) 結晶，所以相信呢群生物都係6,500萬年前隕石撞擊嘅第一批死者。

Robert DePalma指，佢哋於化石場中搵到大量細節，「能夠逐秒地話畀我哋知當時發生咗啲咩，就好似睇緊套戲咁」。

圖片：BBC

但科學界目前對Robert DePalma嘅發現仍有疑問。愛丁堡大學教授Steve Brusatte指出，雖然鰓中有藍莓石嘅魚類化石的確好有可能係死於隕石撞擊，但其他化石就有可能係撞擊之前就已經死咗，只係撞擊令佢哋出土然後又被埋藏。但佢同時亦指出，即使該批恐龍及動物唔係死於隕石撞擊，今次嘅發現依然都係個創舉。

而BBC就會於4月15日播出相關紀錄片，並由David Attenborough爵士負責旁述。