微軟網頁瀏覽器Internet Explorer（IE）日前正式退役，結束27年歷史任務。為紀念IE過去嘅貢獻，韓國有位軟件工程師就整咗塊實體墓碑，引起網友熱議。

據《Reuters》報導，墓碑由韓國軟件工程師Jung Ki-young花費1個月時間設計，以及43萬韓元（約HKD$2600）訂造，並於慶州市一間Café天台展出，碑上除咗刻有IE嘅服役時間，仲有一句搞笑又中肯嘅碑文「它是一個下載其他瀏覽器的好工具」，照片曝光後隨即被瘋狂轉載。

Jung Ki-young表示，佢對IE百感交雜又愛又恨，事關進行網站開發時，韓國客戶總係希望網站能夠喺IE上顯得美觀，但有時喺Safari或Chrome睇落冇問題嘅網站，轉用IE就會錯漏百出，令佢要花更多時間處理兼容性問題。而另一方面，IE確實主宰過一個時代，並喺工作生涯佔重要席位，所以立碑紀念。