機械鍵盤近年越黎越流行，除咗因為有更佳嘅打字手感，更因為唔同廠商都推出風格不同鍵盤，令鍵盤成為大家嘅辦公桌裝飾之一。而最新加入呢個戰場嘅，就有本來出開復古風遊戲手掣嘅8bitdo！佢哋乘住任天堂嘅「Famicon」推出四十週年，推出相應配色嘅機械鍵盤。

呢個「Retro Mechanical Keyboard」總共有兩款，分別以日版Famicon，即大家熟知嘅「紅白機」，以及歐美版嘅「灰機」為主題，兩者除咗配色不同之外，功能上係一致嘅。鍵盤採用87鍵佈局，鋁製底版令鍵盤重心更穩，鍵帽係可更換嘅Dye-Sub PBT材質，鍵軸則係Kailh Box白軸V2，手感較為爽脆，聲音亦較為深沉——用人話講即係：有足夠嘅「嗒嗒」聲，但又應該唔會嘈到隔離位啲同事想打你。另外鍵盤左上角亦有音樂控制旋鈕以及三個ShortCut按鍵，以睇樣行先嘅機械鍵盤黎講，算係相當唔錯。

鍵盤內置2000mAh鋰電池，連接方面就有USB (充電)、藍芽以及無線2.4G。不過目前只支援Windows及Android，Apple用家無份。

鍵盤嘅另一特點，就係附送一個「Dual Super Buttons」，簡單黎講即係用紅白機手掣嘅AB掣為靈感，獨立於鍵盤外一組大型按鈕。Dual Super Buttons利用3.5mm接口直接連落個鍵盤到，最多可同時連接4個 (跟機送一個)，玩家可以自行設定兩粒掣嘅功能。

8bitdo嘅Retro Mechanical Keyboard於官網賣99.99美金，而如果想要多額外一個Dual Super Buttons嘅話就每個19.99美金。以機械鍵盤黎講真係唔貴。或者鍾意呢個風格、又想試下機械鍵盤嘅人可以留意下。

資料來源：8bitdo