由NEXON旗下廠商MINTROCKET開發嘅獨立遊戲《Dave the Diver》，自6月正式發售後就造成現象級反應，除咗於Steam上獲得超過46,000篇壓倒性好評，更於開售十日後賣出超過100萬套，甚至有人認為今年嘅TGA最佳獨立遊戲非佢莫屬。而日本漫畫月刊《快樂龍 (月刊コロコロコミック)」近日亦宣佈，會推出《Dave the Diver》漫畫版，等大家能夠再次體驗「肥大叔」Dave嘅冒險歷程。

圖片：4gamer

《Dave the Diver》採用可愛又情緻嘅8bit畫風，故事講述平易近人、憨厚可愛嘅肥大叔主角Dave，於朋友邀請下接手一間位於潛水勝地「藍洞」旁邊嘅壽司店，而Dave嘅工作就係日頭潛水捉魚，晚上協助極有性格嘅廚師經營壽司店，同時又要完成各個NPC提出嘅任務，以解開藍洞之謎。遊戲結合橫向Rouge-like動作冒險、餐廳經營等元素，而且製作精良、風格輕鬆，深受玩家及一眾遊戲直播主喜愛，堪稱又一「精神時光屋」——我本人就玩咗38個鐘爆機，未拎哂啲獎杯。

而由於遊戲極為流行，所以《快樂龍》就搵黎漫畫家「土田しんのすけ」，將遊戲開篇成漫畫，並於8月12日發售嘅2023年9月號上開始連載。從目前公開嘅內容黎睇，漫畫風格於遊戲頗為一致，至少「肥大叔」Dave冇走樣。喜愛遊戲嘅玩家或者可以留意下。

資料來源：4gamer