農曆新年將至，相信唔少人都打算乘機返「鄉下」——我指日本——旅行兼避年。而如果你計劃於1月25日或之後入境日本嘅話就要注意，因為日本將簡化Visit Japan Web嘅程序，未來入境同海關兩個步驟將會使用同一個QR Code。

以往旅客要先於Visit Japan Web網站上填寫個人及旅程資料，再先後獲得「外國人入境紀錄」以及「攜帶物品、單獨托運物品申報」兩個QR Code，再於入境時向相關單位出示。但由1月25日，日本時間凌晨3點後，Visit Japan Web將會簡化程序，入境紀錄及物品申報將合二為一，成為「入境審查以及海關申報」，完成後旅客只會獲得一個QR Code。

雖然實際上只係「喺入境同海關出示兩個唔同QR Code」同「喺入境同海關出示同一個QR Code」嘅分別，但要留意嘅係系統更新後，所有舊QR Code都不能再使用。換言之，只要你會於1月25日日本時間凌晨3點後入境，就必須於系統更新後申請一個新版QR Code。如果大家係疊住嗰一兩日出發嘅話，就要留意一下啦。

資料來源：Visit Japan Web