浩翰嘅宇宙素來令人好奇，所以當2014年有一顆隕石進入地球、聲波訊號顯示落於巴布亞新畿內亞北部海洋之中，去年更有探測隊於該片海域打撈出「外星物質」後，當然就吸引到科學光嘅目光。不過一個最新調查就發現，原來當年嘅科學家擺咗個大烏龍，所謂嘅「隕石聲波」其實只係貨車經過。

話說2014年1月時，一顆被名為「CNEOS 2014-01-08（IM1）」嘅火流星（簡單黎講就好光嘅流星）從西太平洋上空進入地球大氣層範圍，隨後有科學引用巴布亞新畿內亞北部一個聲波震動檢測站嘅數據，表示隕石就墜落於當地對開海面。去年6月時，更有海洋探索隊於該片海域中，打撈出700個直徑0.05至1.3mm、內含「與太陽系常見嘅合金或天然隕石不符」、「好可能來自太陽系外行星或外星技術」嘅圓球形物質。此次發現曾一度引起科學界討論。

巴布亞新畿內亞北部一個聲波震動檢測站俯視圖

不過，近日美國John Hopkins大學嘅行星地震學家Benjamin Fernando，就重新分析聲波震動檢測站嘅數據，結果發現該次震動竟然會變換方向，而且變換方式，同檢測站後方嘅一條貨車路嘅行駛方向一致，認為當年應該係有人將貨車經過嘅震動誤判為隕石墜落引起。而佢亦利用位於帛琉及澳洲北部嘅核試聲波檢測站數據，推算隕石應該墮落於更遠嘅海域，距離當年原先推算嘅海域有100里遠。

既然當初推算個位置錯咗，咁去年海洋探索隊自然就去錯地方，但佢哋撈上黎嗰啲又係咩黎呢？Benjamin Fernando就表示該堆圓球應該真係隕石殘留物，只不過唔係來自「CNEOS 2014-01-08（IM1）」。Benjamin Fernando表示：「無論搵到嘅係咩，唔理佢係天然石頭定係外星太空船，都同呢粒隕石完全無關——雖然我哋強烈懷疑唔會係來自外星人。」

資料來源：SciTechDaily