去年我哋曾經報導過，因應美國多個州份通過並實行「年齡驗證法案」，所以世上最大成人網站「Pornhub」，及其母公司MindGeek旗下所有成人平台都為咗保護自己而停止向該些州份提供服務。而最新加入呢個行列嘅，就有美國人數第二多嘅德州。而事件最大得益者，就係VPN公司啦。

如果用德州IP上Pornhub，就只會見到以下訊息

去年6月，德州州政府通過名為「H.B. 1181」嘅新法案，其實即係同其他州份嘅「年齡驗證法」大同少異，都係要求部份行業嘅企業網站必須限制未成年人進入，換言之企業要負責驗證網頁瀏覽人嘅身份證或其他身份證明文件。較為特別嘅係，德州版法案仲要求成人網站於首頁加上「奉德州衛生及公共服務部籲：成人影片增加對賣淫、剝削兒童及兒童色情內容的需求。」

而Pornhub方面對於法案嘅態度，其實都係同其他州份立法時如出一轍，認為由企業負責驗證民眾身份，無論對民眾私隱以至企業（萬一出錯，企業要付上刑責）都並非有效方法。所以於政府提出有效方法之前，將會停止對德州嘅服務。簡單黎講即係封鎖德州IP。

而自上週Pornhub封鎖德州IP後，該州份搜尋「VPN」或「Virtual Private Network」嘅人數就暴增。據《Variety》引述Google Trend數字指，德州地區搜尋「VPN」嘅人數，於Pornhub封鎖IP後一日內升咗400%。顯示唔少德州人都為咗睇AV而「翻牆」。

資料來源：Washington Post、Variety