自Blue Origin及Virgin Galactic於過去兩年分別成功載人上太空後，「商業太空旅行」就由小說情節，成為現實中可行嘅體驗——不過，當然係只限有錢人體驗啦。而睇黎有錢人已經唔滿足於「飛上去望下個地球就落返黎」，而係希望上到太空都仲有生活品質，所以近日有公司就推出「太空餐廳」，令富豪們可以望住成個地球食米芝蓮大餐。

卻說專門計劃太空旅行嘅「Space VIP」近日推出新服務「Space Perspective Mission 22」，客人「只需」支付495,000美金（即約HK$385萬），就可以於美國佛羅里達州Space Coast登上號稱「世上第一艘碳中和太空船」嘅「Spaceship Neptune」，進利用太空熱氣球技術慢慢飄向太空，開始一段長達六小時嘅太空旅程。

據官網顯示，乘坐Spaceship Neptune無需任何事前訓練，事後亦可以直接離開，可以話係目前目檻最低嘅太空旅行方式。客人將乘坐加壓船艙到達海拔十萬尺嘅平流層，俯瞰地球曲線並欣賞日出。加壓船艙內有「Space Spa」亦有WiFi，而客人除咗欣賞地球美景之外，仲可以享受到由米芝蓮兩星級主廚Rasmus Munk親自跟埋上太空炮製嘅多道分子料理，據說食物本身就係「啟發自過去60年嘅人類太空探索」，而且本身就係一個故事，去「引起人類對保護地球嘅思考及討論，讓用餐者重新審視地球與地球居住者嘅關係」。要去到呢啲境界，難怪要使幾百萬，去一個離（開）地（球）嘅地方食飯囉。

資料來源：SpaceVIP