眾所周知，進食過量高鹽高鈉食物會增加高血壓、腎病、中風等風險，為咗令大家食得健康啲，最近日本企業Kirin（麒麟）推出一款能夠提升食物鹹味嘅電子湯匙，從而降低用家鹽份攝取。

呢款名為「エレキソルト スプーン（電鹽匙）」嘅高科技湯匙由日本企業Kirin及明治大學共同研發，其原理係透過產生微弱電流，控制食物中嘅鈉離子（人體感受鹽味主要來源），令更多鈉離子集中附在舌頭上，能讓食物在鹽份不變嘅情況下加鹹味1.5倍，而且唔會令用家感到不適或刺痛感，共有四個電流強調可選。

官方表示，電鹽匙首階段將會限量推出200支，售價為19800日元（約980港幣），由即日起至6月2日於官網開放預購。