Sony旗下嘅Vaio手提電腦雖然出名貴、CP值低，但你又不能不承認佢哋啲電腦真係好型同好輕、個獲Sony加持嘅Mon更加係靚到難以匹敵。而黎緊大家就可以用一個相對宜人嘅價錢，獲得Vaio螢幕嘅體驗——唔係Vaio出平價電腦，係佢哋近日推出咗隻便攜式螢幕。

Vaio日前於日本推出Vaio Vision Plus 14，一個1920 x 1200（16:10）嘅14吋便攜螢幕。其最大賣點就係非常輕薄，淨機僅重325g，比起市面上唔少13吋便攜Mon都仲要輕；機身最薄處僅厚3.9mm，最厚處亦只有12.4mm。之所以能夠做到咁輕薄，係因為螢幕用上碳纖維材料結構，連帶嘅好處就係螢幕輕薄得黎亦非常堅固。Vaio嘅官方YouTube就一連上傳五條片黎話畀大家知Vaio Vision Plus 14跌又得、撞又得、屈又得。

與目前一般便攜螢幕一樣，Vaio Vision Plus 14只需一條USB-C線就可以從手提電腦接收10W電以及訊號；如果Vaio Vision Plus 14自己插電的話，亦可以反向提供最多60W電畀電腦使用。Vaio Vision Plus 14本身自帶一個簡單支架，可以立於平面之上，配合附送嘅皮套更可以架於手提電腦螢幕上方。

售價方面，日本官網賣54,800Yen，即約HK$2,650，目前未知是否會於日本以外嘅市場推出。另一樣未知嘅係Vaio Vision Plus 14用咩屏幕，官網只係話佢最高有400nit，同支援100% sRGB啫。

資料來源：Vaio