去年7月5號，Meta襯住當時Elon Mush 入主Twitter（同一個月改名為X）後一片亂局，突然推出功能以至界面都非常似Twitter嘅「Threads」，並於3個月後用戶人數就已經突破1億人。而臨近Threads推出一週年，Meta亦再次公佈Threads嘅使用人數已突破1.75億，算係站穩陣腳，據報明年仲可能會開始有廣告內容添。

跟據Meta公佈嘅數據，自從去年10月突破1億人後，Threads嘅使用人數就用一個較為緩慢，但非常穩定嘅速度增長到1.75億。值得留意嘅係，呢個數字係Threads上嘅總用戶數量，即係哪怕你至係貪新鮮開咗個Account就冇入過去，都會被計算在內。換言之同X（Twitter）每月近3.7億活躍用戶相比依然有一段好大嘅距離。有分析指出，由於Threads算係與Instagram共用同一帳戶，所以非常依賴Instagram將用戶引導至Threads上，亦即大部用家嘅「主力」都係Instagram，Threads只算係「支線任務」，所以真正活躍於Threads嘅人數不多。

圖片：The Verge

雖然話總人數及活躍人數都未算非常出彩，但Meta創辦人Mark Zuckerberg就曾經公開講過，Threads非常有機會成為Meta下一個「十億用戶App」。而明年亦有望扭轉Threads目前仍然蝕錢（雖然對Meta黎講，非常蝕得起）嘅局面，因為據報Meta及Threads高層正考慮於明年推出廣告內容開始謀利。但同一時間，公司高層過去曾表示Threads「不會鼓勵政治及硬新聞內容」、亦利用現金獎勵計劃以鼓勵用戶創作更多「輕鬆」內容，似乎想為廣告商建構一個比X「安全」嘅平台。

資料來源：The Verge