中國消費者過往對iPhone嘅鍾愛可謂「路人皆見」，特別當你係先達附近嘅路人。不過據一份最新報告顯示，中國消費者近年全力支持國產手機品牌，於手機市場整體有增長嘅情況下，Apple iPhone銷量不升反跌，更首次跌出中國手機銷售榜嘅前五名。

圖片：Apple

市場調研機構「Canalys」早前發佈最新一季中國手機市場調查報告。報告指本年度第二季（Q2）中國手機市場按年增長10%，售出超過7000萬部手機，其中最多人買嘅品牌係Vivo，共出貨1310萬部，佔整體市場19%，而Oppo、Honor及華為則緊隨其後分列2、3、4名，第五名則由過去一段時間表現不濟，但最新一季銷售反彈，按年增長17%嘅小米佔據。

圖片：華為

相反，Apple iPhone於中國市場嘅同期出貨量就按年跌6.7%，Q2只出貨970萬部手機，除於銷售榜上首次跌出前五、僅排第六之外，其市佔亦縮減至14%。報告指出近年華為推出嘅高階手機蠶食iPhone市場，其他中國品牌亦受惠於本地化供應鍊及強大嘅顧客忠誠，即使部份iPhone型號於中國有高達23%折扣亦無力回天。

Canalys分析師亦指出，若Apple要收復失地，就需於未來一年內將Apple Intelligence「（中國）本土化」以吸引消費者。另外iPhone 16推出後Apple嘅銷售數字亦有機會轉好。

資料來源：gizmochina