隨住iPhone 16系列預計9月正式發布，相關規格已經曝光得七七八八，如果覺得升級變化不大嘅朋友，不妨展望下一代？最近著名爆料人Mark Gurman表示，Apple將在2025年推出嘅iPhone 17系列新增全新機型「Air」，主打輕簿機身設計，取代現有「Plus」機型。

Mark Gurman日前於《Bloomberg》撰文表示，Apple一直希望在iPhone、Pro、Pro Max三款主要機型以外，尋找出第四款能夠引起消費者共嗚嘅手機。例如Apple曾於2020年iPhone 12系列推出過mini機型，奈何銷情慘淡，所以自iPhone 14起就剔除咗mini，並推出尺寸更大嘅Plus機型取而代之，但結果同mini一樣，未能引起足夠多消費者埋單。其中一個主要原因在於價格，例如iPhone 15 Plus只係比功能更強大嘅iPhone 15 Pro便宜HK$900，如果唔係特別追求大尺寸，更多消費者會決定「加少少」購買一部更強勁嘅手機。

Mark Gurman預計，Apple將於明年iPhone 17系列繼續探索「第四機型」，推出一款更加輕薄及時尚嘅全新機型，名為「Air」，定位介乎於iPhone 17及iPhone 17 Pro之間，專為追求比標準版iPhone更時髦出眾，但又無需Pro版性能、螢幕尺寸、鏡頭嘅消費者而設。