巴黎奧運日前舉行閉幕禮，而整晚（以香港時間黎講係凌晨啦下）嘅高潮，大概係就係Tom Cruise一如傳聞所述，從會場天台「Mission Impossible式」躍下，接過奧委會旗幟，並帶到下屆主辦城市洛杉磯。日前閉幕禮交接儀式製作人Ben Winston接受外媒訪問，就提到係點樣諗到呢個交接儀式，同時亦爆料Tom Cruise答應出演嘅唯一條件。

Ben Winston憶述，佢呢個「將旗幟由巴黎『送』去洛杉磯」嘅概念，其實係來自多年前Conan O’Brien主持嘅《The Tonight Show》第一集，Conan假扮佢唔記得由紐約搬去洛杉磯（節目拍攝地），於是由美國東岸跑到西岸（當然係前接效果）。而當佢有呢個概念後，就第一時間去搵過去多年合作多次、「捨佢其誰」嘅Tom Cruise商量。Ben Winston指出，當時佢提出嘅版本，係巴黎閉幕會場中會有個戴頭套嘅人飛身降下，拎走支旗離開會場，然後播出事先拍攝嘅影片，展示呢個人跑到去洛杉磯荷里活標誌前，揭開頭套等大家發現原來係Tom Cruise黎。換言之，原版計劃中Tom Cruise根本唔會出現於巴黎會場。

在 Instagram 查看這則貼文

LA 2028（@la28games）分享的貼文

在 Instagram 查看這則貼文

LA 2028（@la28games）分享的貼文

縱然當時Tom Cruise表示相當鍾意呢個構想，但佢就提出一個條件：「我唔要用戴頭套嘅特技人，我要做嗰個由屋頂跳落黎，再開車穿越巴黎嘅人。」對於Ben Winston黎講，需要拍攝時間變長（由一日變四日加綵排時間），但有Tom Cruise親身上陣當然更好，於是佢就一口答應。

另外，當日播出嘅Tom Cruise穿越巴黎、登上荷里活標誌等片段，其實早於3月時就已經拍好。而為咗保密，拍攝時Tom Cruise拎住嘅只係一支白旗，後製時先將奧運標誌加返上去。不過得益於Tom Cruise近年不停穿梭各國拍攝《Mission Impossible》系列，所以即使被民眾或媒體拍到過程，大家都只會以為Tom Cruise拍緊戲，直到閉幕禮前Tom Cruise開始於會場實地練習先走漏風聲。

資料來源：Deadline