由韓國SHIFT UP公司開發，目前係PS5獨佔嘅動作遊戲《劍星》宣佈明年將會推出PC版本。咁唔單止代表各位PC玩家都有望玩到呢隻被DEI社群口誅筆伐、但男玩家可以睇主角「伊芙」爬一條繩爬足一日嘅「神作」，更好可能代表未來將有更多Mod推出，令大家嘅伊芙變得更加性感更加「香」！

近來《劍星》可謂情報不斷。首先係近日SHIFT UP宣佈將於11月20日推出與《尼爾：自動人型》聯乘嘅新DLC。據Playstation公佈，今次聯乘似乎唔會有任何新故事或劇情，但《尼爾：自動人型》嘅角色將會於《劍星》中開設特別商店，販售11款聯乘專屬道具。遊戲亦會加入另外四款新服裝及一款配件，當中四款服裝繼續符合男玩家口味，配件「Symbol of Legacy」配件能改變 Tachy 模式的外觀。同時遊戲亦會加入相機模式，等玩家可以拍低伊芙嘅動態同朋友分享。

四款新衫

相機模式

另一邊廂，SHIFT UP於日前舉行第四季財佈記者會時，就指《劍星》自4月尾推出後嘅一輪大賣後，目前銷情「維持穩定」，但黎緊就可能會有第二波爆發，事關佢哋打算於明年推出PC版《劍星》。SHIFT UP仲特別提到鑑於近來《黑神話：悟空》等PC遊戲嘅成功，佢哋認為PC版《劍星》會賣得比PS5版更加好。

我諗一眾玩家都會好希望PC版劍星可以賣得好。事關佢越好賣、就越有機會吸引到各路大神為遊戲製造各種Mod，屆時伊芙嘅造型就不限於換邊件衫咁簡單啦。

資料來源：Playstation、Engadget