如果有得揀，相信大家都會選擇親身入場睇波，支持自己嘅愛隊之餘又感受下現場氣氛。但喺不久嘅將來，運動比賽嘅電視直播模式就可能出現翻天覆地嘅變化，甚至令大家覺得留喺屋企睇電視更加有趣。因為EA Sports近日宣佈，會與運動科技公司「Genius Sports」合作，於未來嘅NBA及NFL（美國美式足球聯賽）比賽中，試驗將遊戲介面結合現實運動比賽，甚至能提供入球機率、戰術等即時數據。

圖片：TNT

話說於美國直播NFL嘅電視台NBC、以及直播NBA嘅電視台TNT，早前不約而同地宣佈會於黎緊嘅部份賽事與EA Sports及Genius Sports合作，於直播畫面上分別加入EA旗下遊戲《NBA 2K》系列及《Madden NFL》系列嘅遊戲介面，為觀眾提供「另類觀看體驗」。例如NBA賽事嘅「DataCast」上，球員腳下會有《NBA 2K》系列嘅控制圈圈、名字等資訊，投射時亦會有出手時間評級、即時計算嘅起手距離、入球機率等數據。而NFL嘅「Madden Cast」雖然冇圖，但就話會有球員評分、即時嘅接球員路線圖、戰術卡等等。簡單黎講就係增加娛樂性嘅同時，亦為觀眾提供更多即時數據。

Genius Sports官網上嘅美式足球比賽「虛撳實境（AR）直播」示範圖

據目前公告，NBA將會於11月至12月期間舉行嘅NBA盃賽嘅8強及4強賽事提供名「DataCast」；而NFL則會於12月21日Houston Texans對上席超級碗冠軍Kansas City Chiefs嘅比賽上提供「Madden Cast」。而且大家唔好以為兩者都只係臨近聖誕，吸引大家睇直播嘅噱頭呀，兩大聯盟都拎得出黎用，就代表背後嘅球員即時追蹤、球賽即時分析技術已經成熟，話唔定將來就會正式引用甚至成為主流，到時睇直播可能比入場更吸引。

資料來源：TNT、NBC