由CD Projekt開發、改編自波蘭同名小說嘅《Witcher》遊戲系列前三集深受玩家熱愛，所以自CD Projekt去年春宣佈會開發系列第四作之後，坊間就一直期待充遊戲能儘快面世。不過根據官方宣佈，大家最快都要等到2027年先有機會玩到。

據《Reuters》報導，CD Projekt 財務長 Piotr Milobovich近日於公司年度財政報告嘅電話會議上，被問到《Witcher 4》嘅發售日期，而Piotr Milobovich則回答指目前冇確實日期可以提供，但為咗「向投資者增加透明性」，所以表示遊戲應該要等到「2026年後」先會正式發售。

CD Projekt聯席CEO Michal Nowakowski過去曾表示，從初步構想開始，一般要用五至六年時間先可以完成一隻3A大作。而CD Projekt最早有關《Witcher 4》嘅公告，就係於2022年時宣佈「會有新嘅《Witcher》三部曲」，數到2027年又真係啱啱好五年。所以其實「2026後」呢個日期並唔算特別令人驚訝。

事實上，唔少分析師事前都估計《Witcher 4》要到2027年第二季先會面世。不過摩根大通嘅分析就指出，CD Projekt唔敢講實係「2027年發售」本身亦值得投資者及玩家擔心，因為咁代表遊戲未來可能會進一步延期。

資料來源：Reuters