任天堂喺昨晚嘅「Nintendo Direct」線上發布會，除咗介紹咗一系列新作之外，仲宣布Switch將於下月推出一項全新功能「虛擬遊戲卡」，讓玩家能夠借出數位版遊戲畀其他家庭成員玩！

據官方介紹，未來所有數位版遊戲都會變成「虛擬遊戲卡」，並顯示在一個專屬管理介面，玩家可以以喺呢個介面度揀「插入」或者「取出」虛擬遊戲卡，操作就如同實體卡帶。藉住呢個全新功能，玩家能夠將主機內嘅虛擬遊戲卡「取出」，然後再借畀其他玩家遊玩。

不過呢個全新功能都有幾個限制要留意：

1.只能借畀家庭成員

虛擬遊戲卡只可以借畀你嘅任天堂家庭群組成員。換句話講，如果想借畀朋友，就要事先將佢加到你嘅家庭群組，而每個群組最多得8個成員。

2.借咗畀人就自己玩唔到

同實體卡帶一樣，當你將遊戲借畀人之後，你自己就唔可以再玩嗰隻遊戲。而且一次過只能借出一隻遊戲，借用期限係14日，到期後虛擬遊戲卡會自動返還畀原持有人。

3.交換遊戲要面對面

想借遊戲畀人，兩部Switch要透過「鄰近主機通訊」連接，即係大家要面對面拎部機出黎先交換到，但交換完成後，借咗遊戲嘅人就可以喺任何地方玩。

新功能預計在4月下旬正式推出。