如果大家有印象，應該會記得舊年Ubisoft停運旗下賽車遊戲《The Crew》所引起嘅爭議。去年有玩家應事件而控告Ubisoft之後，近日案件進入法庭審理階段，而Ubisoft就於法庭上再次強調玩家用真金白銀嘅「唔係隻Game」，只係「進入遊戲的有限授權」而再次引起爭議。

先交待少少背景。《The Crew》係Ubisoft於2014年推出嘅開放世界賽車遊戲，而Ubisoft去年關閉遊戲伺服器後，所有玩家都無法再進入遊戲讀取任何資料，Ubisoft亦冇如《The Crew 2》一樣於關閉伺服器前透過更新容許玩家進行單人遊玩，所以對《The Crew》玩家而言隻Game就係直接冇咗。於是有玩家就以「買咗隻Game但冇得玩」為由控告Ubisoft違反美國加州嘅「虛假廣告法」、「不公平競爭法」以及「消費者法律補救法」等。

玩家同時亦提出當日買到嘅遊戲啟動碼上，清楚寫明有效期到2099年，並認為咁代表遊戲到至少要到2099年仍可遊玩，依家Ubisoft提早將其結束係違反協議。

不過Ubisoft當然就唔同意。其代表律師試圖阻止案件進入陪審團階段時指出：「原告指Ubisoft誤導《The Crew》的購買者，令佢哋相信自己擁有不受限制嘅遊玩權，而非進入遊戲的有限授權。但事實係，消費者已經獲得其交易利益，而且於購買時已被明確告知購買嘅係一個遊玩許可證。」Ubisoft亦指出當日買Game時，有全大階寫明「Ubisoft有權於30日通知後取消一個或多個特定線上功能」，所以購買者應該知道自己買緊啲咩。

目前未知法庭最終會否讓案件進入下一步，即兩位原告要求嘅陪審團審訊。但事件引發加州州長Gavin Newsom早前簽署新法案，要求平台販售遊戲時要寫明玩家買嘅究竟係「遊戲」定「遊玩授權」，而Steam等平台亦於早前跟進。

資料來源：IGN