美國總統特朗普家族旗下嘅特朗普集團（Trump Organization），在當地時間16日宣布成立全新品牌Trump Mobile正式進軍電訊領域，並推出一款金色智能手機「T1 phone」，強調完全由美國設計及製造，定價499美元。

從宣傳圖可見，T1 Phone採用金色金屬外殼，搭配三鏡頭設計，而機背仲刻有美國國旗。官方宣稱，手機搭載6.8吋AMOLED挖孔式螢幕，刷新率高達120Hz，內置256GB ROM(可透過卡槽擴充)、12GB RAM、5,000萬像素主鏡頭及5,000mAh電池，並支援螢幕指紋及臉部解鎖。除咗有USB-C接口，仲有現今非常少見嘅3.5mm耳機孔，而作業系統則為Android 15，不過就未有公布處理器型號。售價為499美元（約HK$3,917），目前已開放訂購，預計8月正式出貨。

除此之外，Trump Mobile更同步推出一項名為「The 47 Plan」嘅流動數據及電話服務計劃，月費為47.45美元，意指Donald Trump分別擔任美國第45任及第47任總統。計劃包含無限通話、簡訊同流動數據，仲有全面手機設備保護、覆蓋超過100個國家嘅免費長途電話，遠距醫療服務，以及由Drive America提供嘅全天候道路救援服務。值得一提嘅係，Trump Mobile並唔會自行建立電訊基站，而係採用美國三大主要電信商提供嘅5G服務。