隨住AI生成工具進步及普及，網上充斥住愈來愈多AI生成假圖及假片，而且效果仲要幾何亂真。為研究人類能否分辨AI圖像，微軟做咗項大型實驗，吸引全球超過12,500人參與，總共進行了大約287,000次圖像辨識。結果顯示，參與者分辨AI圖像嘅整體成功率只有62％，叫做好過擲銀仔(50%)少少。

微軟研究團隊AI for Good Lab在去年8月推出了一個名為「Real or Not Quiz」嘅線上問答遊戲。遊戲會向參與者展示15張照片，題材包括人像、城市及自然景觀，當中有真實照片，亦有由AI工具生成嘅假相（例如DALL-E 3、Stable diffusion 3、Midjourney v6、GAN），參與者需要判斷每張相究竟係「Real（真實）」還是「Artificial（人工生成）」。

研究員分析了超過12,500名參與者，以及大約287,000次圖像辨識數據後，結果發現參與者分辨AI圖片嘅平均成功率只有62％。另外，研究仲發現人類在分辨人物圖像方面表現比自然風景較好，前者成功率有65％，而後者則為59％。研究員認為，結果係同人類天生擁強大嘅人臉辨識能力有關，而且AI生成嘅人像比風景更容易出現明顯瑕疵，例如奇特嘅皮膚紋理。

研究表明，「有圖有真相」呢種說法已經開始站不住腳。為咗應對假資訊嘅風險，微軟就提倡AI生成照片應該要加入更清晰嘅水印，與此同時，佢哋亦開發緊一款更強大嘅AI檢測工具，並聲稱識別成功率超過95％