早前有消息指，Apple首款摺疊式iPhone將採用較闊嘅身機比例，摺埋時就猶如一本薄仔，完全展開後尺寸則接近iPad mini。無獨有偶﹐最近有傳聞指，已經出咗好幾代摺機嘅Samsung，目前亦開發緊一款同樣採用4:3比例嘅闊螢幕摺疊手機，預計最快在明年登場，與Apple首款摺機正面交鋒。

據韓媒《etnews》報導，呢款暫名為Wide Fold嘅全新Samsung摺機，將採用「護照式」設計，內螢幕為7.6吋OLED，比例為4:3；外螢幕則為5.4吋，並支援25W無線充電。無論螢幕尺寸定比例，都同傳聞中嘅Apple首款摺機iPhone Fold非常相近（內螢幕約7.5至7.8吋、外螢幕約5.3至5.5吋，實際規格仍有待確認）。

現時市面上大部分橫向摺疊手機，都採用較修長嘅設計，外螢幕比例多數接近21:9，展開後內螢幕則偏向1:1嘅正方形。呢種設計好處係方便多工操作，例如左右分屏、同時開幾個App多工處理，但喺影音娛樂方面就略嫌尷尬，因為大多數影片都係16:9或21:9，播放時會出現明顯黑邊，未能充分發揮大螢幕嘅優勢。

相反，如果改用4:3比例，視覺體驗會更接近傳統平板電腦，睇片時黑邊會明顯減少、畫面沉浸感更強。與此同時，機身闊度增加後，單手或雙手握持時重心更平均，用起上嚟更好「揸手」，亦更貼近日常使用習慣。若然市場反應理想，話唔定4:3比例會成為下一代摺機嘅主流設計方向。