我哋過去曾經報導過，唔少遊戲廠商都認為現時主流嘅70美金定價太低，一直都嘗試、推廣遊戲應該要賣到80美金。而自從任天堂於Switch 2遊戲上打響「80美金」嘅第一槍（如《Mariokart World》定價就係79.99美金）之後，唔少人都認為其他廠商會跟進。不過近日EA嘅CEO  Andrew Wilson就明確表示，今年內推出嘅遊戲都唔會加價。似乎大家都等緊《GTA 6》推出先決定。

圖片：Epic Games Store

卻說Andrew Wilson早前出席公司第一季財政報告電話會議時，被問到「其他廠商開始將遊戲賣80美金，EA會否跟進」嘅問題。對此Andrew Wilson斬釘截鐵地表示：「喺呢個階段我哋無打算更改遊戲價格。」並表示目前旗下遊戲嘅定價由免費遊玩，到Premium版、Deluxe版都有，已經覆蓋整個價格範圍，玩家可以自行選擇最適合嘅價位入手。所以唔需要大幅改變遊戲嘅定價。

同時佢亦指出EA計算本財政年度（2025年4月到2026年3月）嘅收入預算時，完全無考慮過加價呢個因素。亦即係話於明年4月之前推出嘅所以遊戲，基本價格都係70美金。

年初《GTA 6》會唔會賣到80美金話題沸沸揚揚之時，亦曾有分析師指出目前嘅遊戲有大量不同價錢嘅版本，以應對唔同玩家嘅需求，提高基本版嘅價錢其實會趕走一班非忠心Fans、對價格比較敏感嘅玩家，對廠商而言並非好事，與今次EA表示唔加價嘅理由如出一轍。

但值得一提嘅係，《GTA 6》目前預計明年5月推出，即係下個財政年嘅事。所以亦唔排除其他廠商只係想睇埋《GTA 6》如何定價，睇下市場有咩反應，然後先決定是否於下年調整價格。

資料來源：IGN