長久以來追開「深夜系列」嘅你，相信應該唔會對日本辣妹舞團「CYBERJAPAN DANCERS」感到陌生。而今晚要介紹嘅呢位「AOI」除咗係CYBERJAPAN嘅成員之外黎緊仲會推出實體寫真集，而鏡頭外嘅佢更加係文武全材、樣樣精通。唔好睇樣，淨係睇下佢份履歷就已經令人感嘆「呢個世界公平咩？」

「AOI」係於去年3月加入「CYBERJAPAN」嘅最新成員之一。據佢於CYBERJAPAN官網上嘅自我介紹，佢以前曾經參加過成長地宮崎嘅「宮崎小姐」選美比賽仲拎到總冠軍，之後於宮崎當地出道，拍過廣告、做過主持主播，後來輾轉加入CYPERJAPAN DANCERS而一舉成名。

而除咗演藝活動之外，「AOI」於其他方面亦堪稱文武全材。「文」方面佢大學讀營養師，又真係拎到日本國家營養師資格，而且仲有日本文字處理專業檢定2級、算盤二段、以及睇個名就覺得好把炮嘅「醫療秘書協會全校協議會秘書檢定2級」等資格。「武」方面就更把閉啦！小學時同細佬一齊踢波，竟然踢到於男子隊打邊後衛；後來又學過極真空手道，劈瓦片係佢嘅拿手好戲；甚至連長跑及短跑都係佢嘅強項，曾分別於800米及100米賽跑中拎到全市第一。簡直就係漫畫入面嗰啲完全無弱點嘅天才同學。

如果真係要數佢嘅「弱點」的話，就係佢以前唔太鍾意自己嘅豐滿上圍，所以從來唔著比堅尼，亦唔會著顯露胸部嘅衣服。但自己加入CYBERJAPAN之後佢連呢個弱點都克服埋，唔單止著上性感嘅表演服，近來更踏足雜誌寫真，黎緊10月仲會推出首本個人實體寫真集。如果大家有興趣嘅話，即日起就可以去佢IG到搵Link預訂，限量500本有買趁手呀！