由上年開始彈起嘅Telegram，推出唔夠3年已經有每月1億用戶，成績咁好全靠佢哋私隱保護做得好。因為通話訊息加密處理得好而且難以破解，所以就連伊斯蘭國發動恐怖襲擊都係用Telegram通訊，仲用埋Telegram承認添。

事後雖然有人要求Telegram供出恐怖分子資料同埋刪除佢哋帳戶，不過Telegram老細Pavel Durov講明唔會交出資料，仲話保護私隱比防止恐怖活動更加重要，甚至認為恐怖分子都應該有言論自由。對於近日Apple被FBI要求開後門而構成重大私隱爭議一事，Pavel Durov就公開支持Apple CEO Tim Cook，力撐Apple唔應該同FBI合作破解iPhone。Pavel Durov亦聲稱Telegram會繼續堅持保護用家私隱，事關佢曾經喺俄羅斯創率過最大社交網絡VK，但後來受到政府打壓，拒絕交出異見人士資料之後決定離開俄羅斯，再創辦Telegram。