造價11億美元嘅朱諾號喺2011年出發，用咗5年時間，飛咗30億公里終於到達環繞木星嘅軌道。朱諾號將喺未來20個月，喺距離木星雲層頂4,600公里位置環繞木星運行37圈，同木星最近只有4300公里。朱諾號主要任務係研究木星內部、大氣成份同埋兩極磁場。

由於接近木星會有強烈輻射，所以利用鈦金屬保護，而20米長嘅太陽能板上面1萬8000個太陽能電池，會為朱諾號提供動力。木星係太陽系最大嘅行星，而且科學家亦相信木星係太陽系最早成形嘅行星。木星表層係由氫氣同氦氣組成大氣層，屬於冇固體表面嘅星體。上一次進入木星軌道，係1989年發射嘅伽利略號探測器，預計朱諾號完成任務之後就會同伽利略號一樣墜毀喺木星軌道。

伽利略號由1995年進入木星軌道直到2003年墜毀，8年間收集大量木星資料，而且更發現新衛星。

雖然朱諾號係無人駕駛，但探測器上面其實有三位特別乘客。NASA整咗3隻1.5吋高嘅鋁製LEGO公仔，分別係17世紀意大利物理學家伽利略(Galileo Galilei)，古羅馬神話眾神之王朱庇特(Jupiter)，亦即係木星英文名由來，同埋朱庇特老婆朱諾(Juno)，當中伽利略同朱諾都係去到木星嘅探測器。NASA下一個木星任務將會係2022年探測木星衛星「木衛二」計劃，而且相信木衛二有水存在，所以唔排除會有生命。

呢幾隻LEGO上網有得賣，但冇得炒。