「侵侵」年度Fakse News獎有幾Fake？

文：MenClub 魏文青　　
POSTED ON 26 Jan 2018

自上任以黎，美國總統「侵侵」特朗普嘅管治以至私人行為都成為各大傳媒爭先報導嘅話題，而面對負面報導，「侵侵」好多時都係唔直接回應事件，而指控報導機構係「假新聞」(Fake News)。衰又衰在佢有時又錯唔哂，以至華盛頓報、紐約時報、CNN、時代雜誌等多份傳統大報都需要更正報導甚至導歉。去到上星期「侵侵」更加公佈「年度假新聞獎」，列出上年嘅十一大「假新聞」，咁究竟當中有幾多係「真係假」，又有幾多係「假唔哂」呢？

1. 《紐約時報》Paul Krugman指特朗普上任後經濟不會復甦

首先，就事實而言，特朗普上任到目前為止，美國經濟的確有所改善，其中道指更創下歷年新高，但要憑此指控《紐約時報》係「假新聞」就頗有難度。首先Paul Krugman唔係《紐》嘅記者或者編輯，佢其實係一個經濟學家，喺《紐》有個專欄咁解。第二，Paul撰文時係「侵侵」勝出選舉後第二日，所以與其話係「報導」，不如話係佢嘅「預測」，咁「預測」唔準唔算「假」掛？就算假都唔關《紐約時報》事掛？

2. ABC記者Brian Ross誤報「侵侵」於選舉期間私通俄羅斯，導致股市大瀉
呢個就簡單得多，Brian Ross真係誤報，但ABC好快就作出承認錯誤，Brian Ross亦被解僱。

3. CNN報導「侵侵」及其長子接觸黑客由WikiLeaks偷出來的文件
事實上佢哋接觸嘅文件其實唔係由黑客偷出，而係本身就公開展示，所以都係錯嘅。不過事後CNN亦承認誤報，好多於「假新聞」榜上有名嘅新聞亦指出錯誤。

4. 《時代雜誌》指「侵侵」移走位於白宮辦公室嘅馬丁路德金雕像

個雕像真係冇移走，但實際上《時代雜誌》亦冇「報導」此事，而係其中一位記者Zeke Miller(現聯合報記者)喺自己嘅Twitter上嘅推文而己。而係呢條推文之後短期內Zeke亦跟進指雕像依然存在。

5. 《華盛頓報》以觀眾未入場嘅照片指「侵侵」造勢活動無人出席

同樣地，呢個亦唔係《華》嘅報導，而係記者Dave Weigel喺自己Twitter上嘅推文。咁佢又真係用咗張觀眾未入場嘅相嘅。

6. CNN指「侵侵」訪日期間將成兜魚糧倒入魚池

大家都可能有印象嘅畫面。事實上「侵侵」亦的確係成兜魚糧倒入去，不過其實佢係跟隨日本首相安倍晉三先咁做。咁算邊個錯？

7. CNN指白宮通訊總監斯卡拉穆奇與俄方會面

事後CNN回收報導並向斯卡拉穆奇道歉，亦導致三位CNN調查記者辭職。不過值得一提係CNN其實冇認報導係「錯」，只係指佢「不夠實在(Not Solid enough)」。

8. 《新聞週刊》指波蘭第一夫人不願與特朗普握手

因為片段於Twitter瘋傳而廣為人知，但其實《新》係隱瞞咗部份真相，事實上波蘭第一夫人係有握「侵侵」隻手嘅。

9. CNN指前FBI局長James Comey會反駁「侵侵」指Comey曾多次否認「侵侵」正被調查
我知上面句嘢有啲複雜，但實情係咁嘅：Comey於2017年被免職之前，正調查緊2016大選有否被俄羅斯干預，而由於「侵侵」係當中嘅最大受益人，所以理論上係調查對象之一，但「侵侵」就指Comey曾多次向佢保證FBI冇調查緊佢。而喺Comey被免職後、出席國會聽證會之前，CNN就指Comey會反駁「侵侵」說法，但事實上Comey一開口就指「侵侵」確實不在調查中。

10. 《紐約時報》指「侵侵」政府隱藏環境報告

當時《紐》以頭版報導，但實際上該報告喺幾個月前已經廣泛地公開，所以確實係錯嘅。

11. 所有主流媒體指「侵侵」私通俄羅斯

基本上「侵侵」冇提出任何反駁，只係單純地講「冇呀!」，加上冇指明任何媒體，所以冇法證明係咪誤報啦。