{ SKIP }
文:MenClub 魏文青  
POSTED ON 05 Jul 2018
網絡作家借人氣偷食Fans、拋妻棄子、最後連份工都冇埋嘅事,大家應該略知一二。如果我係成龍,我或者會同情佢犯咗「所有男人都會犯嘅錯」,但作為一個價值觀符合主流嘅普通男人,我們更好奇嘅係,究竟點解有人情願偷食偷到家破人亡、身敗名裂,都唔願意做個從一而終嘅男人。究竟人點解會偷食?咩人會偷食?偷食完又係咪抹下咀就可以「改邪歸正」?我答你唔到,但有啲研究可以答到你。

咩人會偷食?

雖然依家熱話嘅係男人背妻偷食,但喺呢個事事追求「平等」嘅世界,女生偷食實在亦唔係啲咩新奇事。例如香港上年亦有報導指,約會平台訪問330名香港男女後,發現有24%女士承認曾出軌,但男生只有18%。可見偷食唔係男人嘅專利黎。

而根據美國Institute of Family Studies於2017年發表嘅報告,美國大約有20%男性及13%女性曾經有「婚外情」,分別並非如想像中大。其中於18-29歲嘅年齡組,女生有婚外情嘅比例更比男生稍高(11% vs 10%)。不過你班麻甩仔唔好鬧人住,因為隨住年齡上升,男女嘅婚外情比例亦會增高,男女比例差距亦逆轉而且擴大。自50歲至80歲或以上,男性婚外情比例長居20%之上,最高更見26%;但女生最高比例都只係60-69歲組別嘅16%,而且到達70歲後婚外情比例急劇下跌,到80歲以上更只有6%。似乎年齡對偷食嘅男人黎講根本唔係問題。

點解要偷食?

你可能以為男女偷食都係為咗肉體上嘅慾望同刺激,但事實就未必係咁。根據上年7月嘅一個研究,76%受訪年輕男女(平均年齡22歲)指自己出軌嘅原因在於對本身關係嘅不滿,認為對方畀唔夠關心、注意自己,情感上「慾求不滿」,或者覺得呢段關係已經冇一開始咁充滿趣味,於是轉向第三者以「彌補不足」,而「性」或者只係「情感交流」嘅過程。

但又唔好以為出軌就代表兩人嘅關係一定有問題。根據於2017年發表嘅另一個研究,訪問495名年輕男女後,發現大家出軌嘅理由各式其色,尋求性方面嘅刺激固然係理由一,墮「出」愛河、本身就冇諗住忠於一段關係、酒後亂性、想增加自信亦通通係受訪者出軌嘅原因之一。換言之出軌與否與「愛唔愛正印」未必有關。

也許偷開有條路

古語有云:一次不忠,百次不用,如果伴侶出過軌但又承諾改過自身,大家又應唔應該信佢呢?2017年嘅一個研究就顯示,一個曾經出軌嘅人,會再次出軌嘅機會比其他人高3倍!曾經出軌嘅人當中,更有45%真係再次出軌。

原因可能同大家嘅腦部運作有關。當一個人出軌後,面對自己嘅伴侶就需要講大話,咁嘅情況下人會感到內疚,亦正正係呢種內疚(或者預計有呢種內疚),先會令人唔打消再犯嘅念頭。問題係原來人腦係能夠「適應」呢種內疚,一個大話講一次你好內疚,再講你就覺得冇乜嘢。研究指重覆出軌嘅人一係由始至終都乏內疚(已經係反社會人格嘅一種),一係已經適應呢種內疚,所以先會不停犯上同一錯誤。

講咗咁多,大家知道男女都有機會偷食、偷食嘅原因層出不窮、而且大家個腦仲可以適應咗偷食後嘅內疚,咁最後嘅結論係點呢?或者大家應該要問下自己,究竟想要一段點樣嘅關係,又想喺呢段關係中得到啲咩。如果你想要有穩定伴侶,但又想將多出黎嘅愛分畀其他人,咁你好應該有勇氣去同伴侶坦白——咁好彩佢接受,你當然開心;佢唔接受,亦只能代表你哋兩個唔適合一齊。如果你怕失去佢而提出都冇膽,咁你又何來勇氣去偷食呢?青春有限,為咗自己為咗人,凡事三思呀。
香港首家高質網上成人平台上線啦!…就黎!
thezone
仙人監修 香港首家高質網上成人平台上線啦
15 Dec 2018
有興趣嘅朋友嚟到日本時不妨去望望呢個型爆嘅「魔法陣叉電器」!
gags
齊做大魔法師!日本新出「魔法陣叉電器」
14 Dec 2018