1. 蠔

不論中外都相當著名嘅壯陽食品，蠔含有大量鋅及各種胺基酸，有指可以影響賀爾蒙，令你更有精力之餘，性趣亦更加大。不過以學術研究嘅層面黎講，Dr. Lehmiller就話其實未有足夠數據證明食蠔係咪真係有壯陽、提升性快感之功效，需要更多研究數據先可以得出結論，簡單啲講就即係「未肯定」！不過好多人食蠔都唔係純粹為咗壯陽，係為咗好食嘅！所以大家唔使擔心，繼續食啦！

2. 蜂蜜

蜂蜜長久以黎都被視為補健養生嘅食物，西方國家亦視其為提升性趣嘅食物，有指蜂蜜含有大量鉀同維他命E，可以改善性能力退化、性激素分泌減少等問題。但與食蠔一樣，目前仍未用足夠數據證明蜂蜜係咪真係可以提升性趣及性能力，所以如果你係想確保一定有效，蜂蜜就未必係個好選擇啦！

3. 朱古力

Oh, 催情朱古力，一路食一路溶到成個身都係，係咪好Sexy、好興奮同好難洗呢？朱古力之所以會與性趣扯上關係，係因為佢能夠刺激人體分泌被稱為「開心賀爾蒙」嘅血清素，簡單啲黎講即係你食完朱古力會開心啲，減壓啲。問題血清素於性愛黎講其實係結果——人體高潮過後先會分泌血清素(先會爽架嘛)——所以朱古力或者會令你更加開心，但對你嘅性能力就應該冇幫助。

4. 銀杏

準確啲黎講係銀杏嘅種子「白果」。本草綱目指白果「熟食溫肺、益氣、定喘嗽、縮小便、止白濁」，尤其後兩項都係房事過度、腎氣虛衰嘅病徵，外國亦有案例，證明某啲面對性障礙但又因為某啲原因唔能用主流療法嘅人，轉用銀杏之後情況就有改善。以西方醫理黎講，銀杏其實係一種血管舒張劑，能夠加強血液流通，所以對性生活有幫助。但都係嗰句，數據依然未能有確實嘅結論！

5. 人蔘

呢樣就不得了啦！據知目前已經有7個獨立、可靠嘅研究證明人蔘係有助男性性能力，能夠令男性及女性生殖器官嘅平滑肌放鬆，而且增加多巴胺分泌，結果就係勃起時間變長之餘，硬度亦變強！不過你又唔好諗住臨上馬時含片蔘就會即刻鞭鞭有力，研究指都要食幾個星期架！