何謂「聖人模式」？梅開二度靠刺激

文：MenClub 魏文青　　
POSTED ON 07 Oct 2018

一個男人幾時會係最冷靜、最理性？或者有唔少人會答你「高潮完之後」，事關男人高潮後會進入所謂嘅「聖人模式」(又稱賢者時間)，喺呢個狀態下男人會變得非常冷靜，性慾降到接近零，身體亦對各種挑逗免疫，真真正正只係用上面個頭諗嘢，所以可能非常適合做各種重大決定。不過以閨房之樂嘅角度黎睇，「一江春水向西流」後你嘅伴侶或者會覺得未夠喉，但成為「聖人」嘅你又無以為繼，場面就頗為尷尬。究竟「聖人模式」係點黎？如果真係想梅開二度再次上馬，又應該點做？

要知點解決問題，首先都係要知個問題喺邊。所謂「聖人模式」嘅正確名稱係「不應期(Refractary Periods)」，係指男性高潮後因為「感覺閾限」提升而對性刺激冇反應嘅時間，簡單啲黎講就即係你食飽咗，再想刺激你嘅食慾就好難啦。而「食飽」其實都係同賀爾蒙有關，高潮過後主宰興奮同快感嘅多巴胺及睪酮分泌大幅下跌，另一方面腦下垂體分泌催乳素，進一步壓制多巴胺分泌，同時陰莖平滑肌收縮補充一氧化氮，阻礙海綿體充血。而以上呢一切都係需要時間回復正常，呢段時候就係「聖人模式」啦！

回復時間因人而異有短有長，由幾分鐘到幾日不等，一般而言係同身體狀況有關，年紀越大、身體狀況越差，回復嘅需時亦越長。所以你明點解自己後生嗰陣一日七次，依家七日都未必有一次呢？同時大家需要注意，呢段休息時間對你嘅身體黎講係正常需要，如果你強逼自己「抬起你低過的頭來」，有可能會產生生理及心理上嘅不適——食飽仲逼自己搵嘢食咪會反胃——仲要唔好講實際上逼唔逼到呀！

但無論係你自己有意享受梅開二度之旖旎風光，定係因為另一半食到一半正等你滿足所願，某啲時候都的而且確係需要上馬再戰。要縮短聖人模式嘅時間，再簡單嘅方法係給予新嘅刺激，但你食飽咗架啦嘛，所以唔可以再係一般嘅刺激！根據之前講過嘅「柯立芝效應」，越新奇嘅嘢對你嘅刺激就越大，所以可以試下新姿勢、叫女方著對絲襪、轉個地方、甚至只係言語上嘅刺激都會有效！簡單啲黎講就係要落重藥！另外都講過你嘅身體狀況越健康，回復就越快，所以平時鍛鍊下都冇壞架！

又再值得一提嘅係，女性一向被認為無「不應期」(或者極短)，故能享受多重性高潮，若果真係發起茅上黎都唔易應付。而如果你需要時間回氣，又唔想破壞氣氛，請記住你身體仲有好多部位可以滿足對方，坊間亦有大量情趣用品可以協助你！唔使有太大心理壓力架！