日本出生率低，人口老化問題都唔係啲咩新聞，而日本政府亦一直推出不同措施鼓勵市民生育，但最近佢哋就推出咗一個明顯唔鼓勵生育嘅新措施——2021年修改法例，令俗稱「事後丸」嘅緊急避孕藥不再需要醫生處方就可購買。

據日本媒體《Kyodo》報導，日本政府於日前宣佈，為咗防止包含性暴力而產生的意外懷孕，保護受害者及青少年，所以決定於2021年推出新法例，准許人民不需要醫生處方就能於藥局買到事後丸。據報導指目前已經有86個歐洲及亞洲國家有相同措施，日本依家先跟已經係算遲。提提你，呢「86個歐亞國家」，係唔包香港，目前香港都係要有醫生處方先可以合法買到事後丸——唔合法就無謂講啦下。

事後丸係於性交後72小時服用，能大幅減低懷孕機率，但如果睇醫生先能夠得到，先唔好講夠唔夠膽睇醫生 (特別係青少年)，就算夠膽，睇得黎可能都已經過咗72小時。所以為咗避免意外懷孕，降低購買事後丸嘅門檻的確係一個好方法。唔知新政策會唔會影響安全套銷情呢？第時開返關又會唔會有人走水貨返黎呢？