講起做愛嘅地點，絕大部份人喺絕大部份情況下都係會選擇 (或者習慣地去咗) 睡房張床上面進行，但所謂再鋒利嘅刀都有生鏽嘅一日，再好un嘅床亦同樣有變悶嘅一日。如果要搵啲新意，最簡單就將做愛地點移離開張床，進佔間屋其他房間。問題係究竟喺間屋嘅邊個位做愛先係最好？英國購買網站OnBuy.com就做咗研究。

OnBuy.com搵咗50對情侶，並要求佢哋喺屋企不同位置、房間做一次愛，再紀錄做之前同做之後嘅心率，以及事後為每一個位置評分 (10分滿分)，從而得出一間屋中最令人興奮、滿意嘅性愛位置。結果排第一嘅係浴室，平均心率急升73%去到121BPM，評分更有8.5，似乎一個又濕又暖大家又「肉帛相見」嘅地方最能提升「性趣」。而緊隨浴室嘅就係露台，心率會升到116BMP，明顯就係因為會有「比人睇到」嘅興奮。

好啦，咁最差嘅性愛地點又係邊呢？好多人會估係睡房，但根據該調查，評分最低、心率提升最少嘅其實係樓梯，同樓梯之間個轉角位 (英文叫Landing)，喺呢個位做愛心率只會提升43%到100BPM左右——不過喺香港，屋企入面有樓梯嘅乃係少數，所以對普羅大眾黎講，似乎睡房都係最差嘅性愛位置啦。