英語世界中有個字叫「Makeup Sex」，意指情侶鬧交後 (或鬧交時) 利用做愛作為和解 (Make Up)嘅方法，簡單啲黎講就即係你同女朋友一鬧交，你就抱佢上床。而喺西方流行文化當中，Makeup Sex唔單止能夠解決情侶之間嘅問題，甚至被認為係比尋常性愛更激情、要好好把握機會嘅性愛。問題係，Makeup Sex」係咪真係咁神奇、咁舒暢？又係咪真係解決情侶問題嘅好方法？

為咗探討Makeup Sex嘅效用，來自新西蘭奧克蘭大學及美國佛羅里達州立大學嘅Jessica A. Maxwell及Andrea L. Meltzer於去年做咗個研究，搵黎107對新婚夫婦，以日記方式回答「今日對方有冇做到任何你唔鍾意嘅嘢？」、「今日你哋有冇做愛？」、「你有幾滿意呢場性愛？」、「你有幾滿意你嘅性生活？」、「有幾滿意你嘅婚姻？」等問題。

研究結果顯示，首先情侶有鬧交 (任何一方認為對方有做令佢不滿嘅嘢) 嘅同一日內，會做愛嘅機率就已經比平日要低——合理呀，鬧完交面左左點做啫？——但更重要嘅係即使有做，受訪者對該場性愛嘅評分都會低於平日嘅「正常性愛」，換言之Makeup Sex並非一場更好嘅性愛。

另一邊廂，係「有鬧交又有做愛 (Makeup Sex)」嘅日子中，受訪者對「婚姻滿意度」嘅評分會高於「有鬧交但冇做愛」，換言之「Makeup Sex」又真係有Makeup嘅作用。

總而言之，如果你係為咗一場更令人滿意嘅性愛，咁Makeup Sex對你係冇幫助，但如果你咁啱同另一半鬧交，又咁啱有做愛嘅機會，咁一場性愛又真係可以 (至少短期內) 減輕對段關係嘅影響。但正如心理學家David W. Wahl於《Psychology Today》中撰文指，Makeup Sex只係治標而非治本，係冇解決過本身令情侶鬧交嘅問題，甚至會帶來「鬧交就有愛做」嘅不良聯繫。所以唔好依賴啦！