相信大部份動漫迷，最唔想見到嘅就係心儀作品真人化，除咗怕角色造型會崩壞之外，更會因為時間所以而硬生生將劇情壓縮成兩個鐘嘅電影，令故事變得鬆散又交代唔清楚。隨住Zack Snyder新作《Army of the Dead（不死喪軍）》於Netflix上映，佢近日就接受著名Youtuber「Tyrone Magnus」訪問，期間被問到有無打算拍套《龍珠Z》真人版電影，佢就表示「如果有機會嘅話，我會考慮。」

起初主持人都係傾下有關《Army of the Dead（不死喪軍）》嘅事，不過突然話風一轉，就趁機問Zack Snyder「我知你拍過《Sucker Punch（天姬戰）》呢類漫改電影，你之後會唔會考慮拍多一部漫改電影？應該準確啲咁講，你會唔會拍《龍珠Z》真人版？」Zack Snyder就回答「如果有機會嘅話，我確實會考慮。我當然會拍漫改電影，因為我自己都好鐘意睇動漫，仲成日同阿仔一齊睇。雖然佢仲細有啲作品可能唔太適合，不過我哋都係照睇，哈哈。」

不過各位粉絲又唔使太擔心嘅，自從佢同華納兄弟鬧翻之後，就轉投Netflix懷抱，新作《Army of the Dead》亦獲得大量好評，早排更宣布要「加碼」推出緊衍生動畫《Army of the Dead: Lost Vegas》，另外佢自己又開發緊一套以北歐神話作背景嘅原創動畫系列，相信佢應該冇咩時間啦。

2009年嘅龍珠真人版電影《龍珠：全新進化》就因為拍得太差而被人鬧爆，目前IMDB評分只有2.5分（10分滿分），最終製作人員更向觀眾公開道歉。

資料來源：screenrant、Youtube@Tyrone Magnus