就算再恩愛嘅夫婦，朝見口晚見面都一定會有嘈交嘅時候，而根據我問過身邊結咗婚嘅朋友，發現最容易令夫婦嘈交嘅原因，一定班男人唔做 (或者Hea做) 家務，所以當我話你知，有個外國研究發現唔做家務嘅男人收入會高啲，你係咪以為可以拎住篇文同老婆講「我唔洗碗係有原因架！」呢？咁我就建議你睇哂成篇文先啦下…

根據美國聖母大學 (University of Notre Dame) 做嘅一個研究，發現相比起「合作嘅男人」——即係大家口中所謂嘅暖男、好有同情心、好友善嘅男人，「不合作嘅男人」(亦即係較為自利、好勝) 會更少參與家務，而又因為佢哋少參與家務，所以能夠將各多心機時間投放於工作之中，所以普遍黎講事業會更加成功，亦即係收入會更高。

特別係當一個傳統「男主外女主內」嘅「不合作男人」，遇上「賢妻良母型女人」，由於女方做哂所有家務，男方全心全意投入工作，對收入嘅影響就更加大。

不過！要注意嘅係要有以上效應，第一你自己本身要有「不合作」嘅性格、第二係你要有個願意「主內」嘅老婆。「男人唔使做家務」只係呢兩點嘅結果而非原因。而且你唔做家務慳到嘅時間心機亦必須要投放入工作先會對你嘅收入有影響，換言之如果你只係因為懶而唔做家務，對你嘅收入係冇幫助。

實際上研究團隊亦唔係想幫男人搵唔做家務嘅理由，而係提議公司提供工作、收入以外嘅支援，例如幫手湊小朋友、公司認證嘅家務助理服務等，減輕本身冇「不合作性格」，又或者太太唔係「主內」嘅員工嘅家務責任，令佢哋都能夠投放更多時間心機於工作之上以獲得成功。

再換言之，呢篇文你係唔應該拎去畀你老婆睇，而係應該拎去畀你老細睇。