EA喺上個禮拜公開最新大作《Battlefield 2042》首條宣傳片，入面充滿各種致敬情節，無論係用沙灘車撞直升機，定係跳出戰機用火箭筒殺敵，都有前作嘅影子，相信各位Battlefield老玩家睇完都會既興奮又感動。不過由於只係宣傳片，所以都唔敢跟車太貼，深怕會有「貨不對辦」嘅情況出現，尋日EA就曝光首條實機試玩片段，除咗真係有沙灘車撞直升機，仲見識到傳說中嘅天氣變化系統，沙塵暴場景就好似睇緊戲咁壯觀。

今次《Battlefield 2042》拋開一戰、二戰故事，就同個名一樣，將時空設定為近未來，故事講述由於資料短缺引致全球發生大規模難民潮，美國同俄羅斯捲入一場全面戰爭，人民各自加入雙方陣營為生存而戰。

從實機片段可以見到，今次作品冇論空戰定係陸戰都各有特色，就算做隻步兵仔都可以打飛機扭轉局面，不過最吸引眼球就係今次新增嘅天氣系統，上百位玩家喺滿天黃沙嘅沙塵暴入面鬥得你死我活，場面混亂得嚟又充滿刺激感，睇嚟EA上禮拜條宣傳片冇吹大到（好似係）。

據官方資料，新一代家用主機以及PC平台能夠展開128人同場混戰，而PS4及Xbox One亦可以最多64名玩家混戰。除咗有全新嘅天氣變化系統，今次亦會加入多款武器及載具，等玩家自由規劃各種戰術。遊戲預計於10月22日正式發售，支援PS4/PS5、Xbox One/Xbox Series X|S以及PC（Origin、Steam、 Epic Games Store）等多個平台。

《Battlefield 2042》上一條宣傳片。

資料來源：EA