唔少女優都會化名演出不同作品，所以「AV認人」並非罕見之事，但近日意大利就發生一單非常悲慘嘅「AV認人」事件。意大利AV女優「Carol Maltesi」被殺害並分屍，最後警方要靠曾經睇過Carol作品嘅影迷提供資料，先知道其身份。

卻說本月中時，意大利警方於博爾諾 (Borno) 街上發現一個裝有人類殘肢嘅黑色膠袋，但由於屍體被發現前曾被雪藏多月，到發現時又已經解凍損毀嚴重，加上死者面部被燒毀，所以警方一時無法判定死者身份，最後只好將死者身上嘅紋身照片公開，希望民眾可以提供協助。結果就有人認出死者身上嘅豹紋紋身，與意大利女優Charlotte Angie身上嘅紋身十分相似，意大利警方循此線索追查，結果確認死者身份為藝名Charlotte Angie嘅 Carol Maltesi。

據報Carol現年26歲，育有一個6歲嘅兒子，除咗以Charlotte Angie之名拍攝AV外，佢亦有經營IG以及OnlyFans。據其Fans們透露，佢哋留意到「Charlotte」自一月起就冇再更新社交媒體，但大家都以為佢去咗外國拍攝。直到3月時佢缺席一早約定嘅脫衣舞表演邀約，先有人以失蹤報案。

據意大利媒體報導，案件兇手為43歲美食Blogger Davide Fontana。佢係Carol嘅鄰居，亦曾於其交往。佢於1月時與Carol性交後發生爭執，最後以槌仔毆打Carol全身，再用廚刀割開其喉嚨。及後因為害怕有人認出Carol身份而將其肢解，雪藏後再棄置。期間佢更冒充Carol回覆親朋訊息，以及為其交租以作掩飾。甚至當警方發佈Carol紋身照、有人認出後向意大利記者Andrea Tortelli提供線索、Andrea Tortelli再向Carol作WhatsApp查詢時，Davide Fortana亦冒充Carol回覆：「好多人都話個女仔好似我，但好彩我冇事」。

目前Davide Fontana已被意大利警方拘捕並認罪。

資料來源：Telegraph