雖然話好多男人都聲稱自己唔鍾意整過容嘅女仔，但觀乎退役AV女優明日花綺羅多年來嘅人氣，似乎大家對女仔整容實在又唔係太抗拒。明日花近來出演日本電視節目，不單止大方承認自己個樣「幾乎全部都整過」，仲話自己三日前先「更新」咗個樣。

明日花將作為嘉賓，出演今晚播放嘅日本綜藝節目《ホンマでっか!?TV》嘅「最新美容整形」單元。明日花於節目坦言自己「幾乎全部都整過」，而且最近一次接受整容只係三日之前，所以今次係以「新樣」首次亮相節目。而睇節目截圖以及明日花自己Post嘅休室照片，可見佢對眼似乎變得更大更圓、個鼻亦非常「間尺」。

在 Instagram 查看這則貼文

明日花キララ（@asukakiraran）分享的貼文

雖然明日花個樣明顯有經過後天加功，但似乎無阻大家視佢為整容人辦，唔少人都拎住佢個樣去搵整容醫生希望可以「Copy & Paste」。而明日花就表示非常感謝其他女性都鍾意佢個樣，但透露有時會發生朋友會喺街上見到佢嘅「複製品」，然後誤以為見到明日花本人，再走去同佢本人講「我見到你喎」嘅笑話。