當你年紀漸長，身邊就會有啲同你差唔多年紀、想拍拖結婚但又單身好耐嘅女性朋友，而如果你多口去問下佢哋「你其實想搵個點嘅男人呀？」佢哋通常都答你「我要求唔係好高，普普通通就OK架啦」。近日有個日本網民就聽到朋友抱怨「我只係想搵個好似《蠟筆小新》個爸爸野原廣志嘅普通男人，點解咁難？」結果推主一分析，先發現野原廣志一啲都唔普通！

婚活で苦戦してる友達が「クレヨンしんちゃんの野原ひろしみたいな普通の男でいいのにロクな男いない〜」って愚痴ってたけど野原ひろしは30代、身長180cm以上、年収600万以上、商社係長、都心まで好アクセス立地に4DKの二階建て一軒家を所有、車持ち、愛妻家で子煩悩、紛れもないハイスペ男子です

— 限界社不ちゃん (@ggnka___icha) May 6, 2022

自稱曾經於夜場工作，目前已退休想結婚嘅Twitter用戶「限界社不ちゃん @ggnka___icha」，日前於Twitter分享咗一則小故事。佢話佢有個因為結唔到婚而苦惱嘅朋友向佢抱怨，「我只係想搵個好似《蠟筆小新》個爸爸野原廣志嘅普通男人，點解咁難？」驟耳聽落去，「野原廣志」呢個標準好似又真係唔高，但推主分析過後，發現野原廣志其實係個「三十幾歲、身高180cm以上、年收入600萬Yen以上 (約HKD$36萬)嘅公司經理，仲要喺交通便利嘅地方有一棟4房兩廳兩層大屋、有車，而且仲極愛佢老婆冴子」分明就係個極高質嘅男人，唯一嘅缺點大概就係有腳臭。

推主此文一出，立即獲得大量日本網民認同，目前已經有24.5萬個讚好、3.2萬次轉推。留言方面，除咗有人認同「野原廣志係個好男人」之外，亦有唔少人討論緊女生們嘅「普通男人擇偶標準」其實一啲都唔普通。例如有人話喺交友程式上，見到有女人話希望搵個「30頭、年收入800萬Yen，鍾意煮飯、做家務有高級車及於市內有大宅嘅男人」仲話個男人最遲五點就要返到屋企，但其實單單「年收入800萬Yen」一項，成個日本只有10%左右嘅勞動人口符合，就算唔考慮女方條件吸唔吸引到對方，淨係要搵到呢個人出黎嘅機率都非常低。