香港男士對於日本女仔不嬲都有個情意結，唔少人都希望搵到個日本老婆、或者至少試下同日本女仔約會，所以相信當大家見到日本政府最新發佈嘅報告，指日本「20代 (20-29歲)」女性中，有一半人係單身、其中有1/4更加係從未拍過拖嘅「A0」人士時，你係咪覺得自己可以「娶個日本妹」嘅機率大增呢？事實又唔一定係咁喎……

日本政府日前發佈2021年嘅「男女共同参画白書」，亦即係紀錄去年日本人中結婚、約會等數據嘅統計。其中2021年整個日本只有51.4萬宗結婚申請，乃係日本戰後最低數字，比起1970嘅102.9萬宗更加係大跌一半，換言之即係日本對結婚嘅意欲非常低。但其實佢哋連約會嘅意欲都非常低，因為同一個調整發現，日本20代女性中，有超過一半 (51.4%) 目前係單身，男性單身數字更高達65.8%；更重要嘅係20代單身者中，有25%女性及40%係從未拍過拖嘅「A0」，就算去到30代 (30-39歲)，單身者中都有20%女性及35%男性係從未拍過拖。

圖片：Goo.ne.jp

換言之，日本男女係真正奉行緊「其實自己一個更開心」嘅生活態度，唔少人都認呢世都唔結婚、甚至完全唔拍拖都唔係問題，亦有人認為疫情強逼大家減少社交活動，令更多人發現原來自己一個都可以好好、甚至更好，結果令大家對結婚、拍拖嘅意願更低。再換言之，日本唔係有一大班單身、甚至未拍過拖嘅女性等緊你哋去識，而係有一大班根本就冇打算拍拖結婚嘅年輕人。

資料來源：Goo.ne.jp