泰國網民「Phafun Jantadej」日前於個人facebook分享佢隻貓主子身上嘅花紋，話同隻貓一齊生活咗廿年，都冇為意原來主子左右身上嘅花紋竟然同兩個名人非常相似。事件傳到去日本後，日本網民都認同主子身上嘅花紋好似人，但對於似邊個，就同「Phafun Jantadej」有好大出入。

Phafun Jantadej日前於Facebook分享咗佢隻貓嘅右邊圖，佢話同隻貓一齊20年，先發現主子右邊身嘅花紋原來好似著名畫家梵高，到昨日又上傳埋主子左邊身嘅花紋，話睇落去好似著名男演員Dwayne Johnson。其中第一個帖文獲得大量facebook網民們認可，帖文被分享超過2,300次。

不過消息傳到去日本網民面前時，網民就唔太認同「Phafun Jantadej」嘅睇法。日本網民話佢哋都覺得主子身上嘅花紋似人樣，但點睇都係《Street Fighter》中嘅著名角色「Zangief」，亦即香港玩家口中嘅「蘇聯佬」。唔知大家又覺得邊個似啲呢？