因為近來嘅新聞，相信大家可能會覺得整個東南亞都唔太安全，然後近日泰國更傳出「海邊驚現裸女屍體」嘅新聞，或者會令大家產生恐怖聯想。不過件事，其實就唔係大家想像中咁，因為呢條「女屍」雖然可能大家都「認識」，但佢實在就唔係一條「屍」黎。

圖片：Dailymail

卻說今月18日時，一群遊客於泰國春武里府邦勝海灘上，發現一具上身以至頭部都被衣服覆蓋、下身完全赤裸、以捲縮姿態趴喺沙上嘅「屍體」，遊客當然大驚並立即報警，而警方亦火速到場查看。但佢哋到場之後就發現，呢條所謂「女屍」，其實係一個女性形象嘅超像真1:1成人玩偶，簡單啲講即係一個「高級Mary」。更巧合嘅係，個成人玩偶嘅頭部其實已經甩咗兼不知所縱，但就偏偏有件衫遮住咗玩偶嘅上身，令離遠睇落同個真人無疑。

圖片：Dailymail

雖然係虛驚一場，但當地警方都將個成人玩偶帶返警局調查，並發現佢係出自一間叫「AV Idol」嘅廠商，售價高達二萬泰銖，即係大概HK$4,400。當地警方表示，相信係有人將個玩偶掉落附近嘅河道，再被水流沖上海灘，並表示目前個玩偶被存放於警局當中，歡迎物主去認領。

資料來源：DailyMail