日本SM表演者上野幸隆，於7月尾時被人偷走咗一整個手提行李箱嘅「表演工具」，雖然佢立即報警，但個行李箱就一直都搵唔返。直到今個星期三，日本警方召集大量人手，仲叫埋爆炸品處理組出動，終於就搵到上野幸隆個行李箱，而且整個行動仲上哂新聞——因為佢個行李箱，被誤以為係路邊炸彈。

事情係咁嘅，日本當地時間星期三，有人報案於靜岡縣掛川市嘅一個停車場，發現一個無人認領嘅金屬外殼手提行李箱，附近居民覺得非常可疑所以立即報警。而日本警方亦火速到場，將附近300米道路封鎖近三個半鐘，並搵埋爆炸品處理組出動，當地電視台仲搵埋直升機拍攝，一切嚴陣以待。但當爆炸品處理組人員打開個箱後，就發現入面唔係炸彈，而係一大堆成人用品。

無論係「發現炸彈」定「發現個炸彈其實係成人用品」，兩樣都非常值得網民關注，所以有關消息就於Twitter瘋傳。就喺呢個時候，上野幸隆就發現新聞片段入面個箱，好似係自己嘅。

SM道具置き引きされました。

警察なうです。

— 上野幸隆@11/11池袋ミカド劇場 (@fenrir0625) July 29, 2022

……っぽいな…… https://t.co/jdblK7yv5J pic.twitter.com/6Rk2kycw0c

— 上野幸隆@11/11池袋ミカド劇場 (@fenrir0625) October 5, 2022

上野幸隆立即於Twitter發佈自己個箱嘅舊照，並留言指「靜岡發現嗰個箱，唔通係我嘅？」然後佢再仔細地對比新聞片段影到嗰個箱，最後確信就係佢個箱。上野幸隆嘅兩個認領帖文吸引超過1.6萬個讚好，網民紛紛表示件事太好笑。而雖然上野幸隆瞬間獲得名氣，而且仲有機會拎返啲架生，但佢回應網民時就話自己笑唔出。

資料來源：FNN