下星期就情人節，相信各位男士都絞盡腦汁，希望搵到份女朋友/老婆滿意，至少收到唔會嬲嘅禮物，但你又有冇考慮過自己想收到啲咩禮物？近日有外國網民發現，中國網上服裝品牌「SHEIN」推出咗一件極度性感嘅「內衣」，而且只賣3.99英鎊，或者大家都可以考慮買返黎慰勞自己——我指請另一半著你睇，唔係你自己著呀下。

卻說於Tiktok上有7.4萬Fans嘅「Staceymurf」，上年8月時就發現SHEIN上有一件極度性感嘅內衣，其構造基本上就係三塊僅僅遮到三點嘅布，再用幾條繩連埋佢就係，背部位置更加係幾乎一絲不掛。而Staceymurf表示，作為一個肥妹，佢覺得呢件嘢「相當可怕」，就算佢有好似圖入面個Model咁嘅身材，佢亦會非常擔心「啲嘢跌到周圍都係」。而下面嘅留言亦表示，著住呢件嘢，就算行一步都應該會走光，用超能膠痴都搞唔掂。

圖片：截圖自SHEIN

但平心而論，呢件嘢喺SHEIN個網站上，係放喺「女性性感內衣」嗰一欄，同一個類別其他產品係有校服、蕾絲、通窿等相當「情趣」嘅元素。換言之，佢其實都唔預你會著出去畀大眾睇，作為情人節禮物可能就係最合適不過——如果你夠膽送、另一半又夠膽著、而你又對佢嘅身材好有信心，咁你今個情人節就應該會過得好開心啦！