相信成日夜媽媽匿埋睇「日本內容」嘅各位，對於日文句子中出現「○○○○」等符號應該唔會感到陌生。使用呢類符號，主要係避免直接表達大多與「性」相關嘅敏感詞語，等讀者們自行填充完整句子意思。但如果遇上充滿創意嘅讀者，填上完全唔同嘅詞語，整句句子嘅意思就會變得完全唔同。好似日本大正製藥最近推出嘅一個男士營養品廣告，就被網民改成Pokemon變身藥。

卻說大正製藥早前為旗下男士營養品「ミナルギンDX」推出網絡廣告，廣告圖中有一名新穿單薄睡袍、擺出撩人姿勢嘅女子，並配上「○ ● ○ ● ンが欲しいの... (我想要○ ● ○ ●ン) 」嘅句子。其中「○ ● ○ ●ン」除咗可以填入產品名「ミナルギン」之外，其實係暗指「オチンチン」，亦即男性生殖器官嘅暱稱。整個廣告就係想營造一個「女朋友/老婆好想要，咁你就要努力滿足佢，於是就要飲男士營養液」嘅感覺。

わざわざ白丸黒丸に分けてるということは白黒それぞれ同じ文字が入るということで、そうなるともう

「ルガルガン」

しかありえない

ポーズも一致してるし……

ということは大正製薬が売ってるのはポケモンになる薬でFA pic.twitter.com/qeZSRRemQO

— とりえ (@trpla226) July 16, 2023

不過有網民發現，「○ ● ○ ●ン」其實亦可填上其中一隻Pokemon「鬃岩狼人 (ルガルガン)」嘅名字，而且唔單止個名可以完美填入，甚至仲搵到張鬃岩狼人擺出與廣告圖中女子一模一樣嘅姿勢，令呢個誘惑廣告瞬間變成笑料。有網民笑稱，「原來食咗就可以變身鬃岩狼人呀」。

同時廣告亦引嚟唔少網民吐糟，例如廣告圖中嘅產品名(ミナルギン)，與下方連結中產品名不同 (ミナギルン)，疑似係打錯字；又有網民上網搵出價錢後，表示呢隻營養液非常貴。但無論如何，相信從此以後，大部份人人睇到呢個廣告都只會諗起「鬃岩狼人」。