人腦嘅運作其實充滿奧妙，你以為你控制到佢諗啲咩，但好多時你又控制唔到。例如近日有個研究就發現，原來大家喺做愛途中都會不停諗嘢，而且絕大多數都同「做愛」本身無關，就算有關都相當負面！

據《New York Times》報導，英國成人玩具品牌Lovehoney早前做咗個研究，搵黎2,000名成年人去分享佢哋於做愛過程曾經諗過嘅事。結果發現最常見嘅係「未做嘅家務」、「下一餐食咩」、「最鍾意嘅電視節目或電影」以及「工作上嘅事」。而有超過四份一男士坦承做做下愛會突然諗咗去自己支持嘅球隊 (女性只有11%會咁做)。

縱然有80%受訪者表示，自己都會諗同該次性愛相關嘅話題，但個切入角度似乎頗為負面。例如有超過一半人會諗「希望另一半會於性愛時做嘅嘢」，而有53%人會諗「究竟幾時先做完？」。另外有57%女性及52%男性會諗「我幾時先會到達高潮？」整體感覺相當不情不願。

同一個研究亦發現，2,000名受訪者中，有26%表示不滿意目前嘅性生活，而且不滿佔比會隨年齡而增加。例如18-24歲組別中只有11%表示不滿，25-34歲組別就升到18%、35-44歲再升到23%，45歲或以上組別中更有33%受訪者對性生活不滿。似乎受訪者之所以會分心，同佢哋對性生活不滿之間有所關連。

而品牌就建議大家可以善用成人玩具 (重伸一次，佢哋就係成人玩具廠商) 為性生活增添新意，創造新嘅體驗，以提升滿足度。而研究亦表示有過半受訪者的確會於性愛過程中諗起性玩具。

資料來源：New York Post